كتب: سعيد عرفه سليم :
*الدكتور أحمد مستجير.. العالم الذي أراد أن يزرع الصحراء بمياه البحر*
في سنة 1989، كان عميد كلية زراعة القاهرة الدكتور أحمد مستجير قاعد على شاطئ البحر المتوسط، وبيتفرج على نبات غريب اسمه "الغاب" طالع لوحده في المية المالحة، من غير ما حد يزرعه ولا يسقيه.
ساعتها سأل نفسه سؤال عبقري: ليه القمح بتاعنا ميموتش لو سقيناه بمياه مالحة زي الغاب ده؟
من هنا بدأت فكرة مشروعه الأشهر *"زراعة الفقراء".*
الراجل اللي كانوا بيسموه أبو الهندسة الوراثية في مصر، جمع فريق من 20 عالم من كلية الزراعة وقعدوا 15 سنة يشتغلوا في معمل صغير.
الفكرة كانت تهجين، ياخدوا جينات التحمل للملوحة من نبات الغاب، ويزرعوها جوه خلايا القمح والأرز والذرة.
وبعد تعب سنين، النتيجة أبهرت العالم كله:
قدر يطلع 4 أنواع قمح و 12 نوع رز و 8 أنواع ذرة، يقدروا يعيشوا في الأرض الصحراوية المالحة ويشربوا مية مالحة مخففة.
كان حلمه بسيط: مصر عندها 2 بحر وصحراء قد 10 دول، لو زرعناها بمياه البحر، عمرنا ما هنستورد رغيف عيش تاني.
*ليه الحلم موقفش؟*
الدكتور مستجير نفسه قال في حوار قبل وفاته: البحث محتاج تمويل ضخم وتجارب سنين.
والمشكلة العلمية اللي قابلته إن الري بمياه مالحة بيخلي الملح يتراكم في التربة، ومع الوقت الأرض بتبور ومتتزرعش. وكمان إنتاجية القمح كانت قليلة مقارنة بالقمح العادي.
الدولة وقتها معملتش المشروع القومي اللي كان بيحلم بيه، والبحث اتركن في أدراج الكلية.
الدكتور مستجير مات سنة 2006 وهو زعلان على حلمه، لكن تلاميذه بيقولوا إن الصين والهند خدوا فكرته وطوروها، لكن محدش فيهم لحد النهارده قدر يزرع بمياه البحر الخام مباشرة، لسه كل التجارب بمياه مالحة مخففة.
النهارده مع أزمة القمح والمياه، اسم أحمد مستجير رجع يظهر تاني، وناس كتير بتطالب الدولة تبص على أبحاثه وتكملها.
الراجل ده مكنش بيحلم يبقى غني، كان بيحلم إن مصر تزرع أكلها بإيدها من صحراءها وبحرها.
*بقلم: سعيد سليم - حكايات مصرية*
